【親子周末】城中必食 3個全新Weekend Brunch

新Brunch一籮籮,今次介紹的早午餐雖命題為親子,但其實本身就好豐富而水準不錯,加少少錢仲有齊紅白酒香檳清酒飲,真心推介,趁住就快周末同朋友、家人約埋去食啦~~

豐富到爆炸 勁墟撼的Zuma周末早午餐

這個brunch大推,因為小編親身試過,而且現場所見勁墟撼,極多人之餘仲好多小朋友,可能因為空間大、樓底高,加上食物選擇多,甜品亦很吸引,所以大量一家大細來吃。

講返食物,主打西日菜,頭盤和部分熱食是buffet形式,自助餐區好豐富,壽司刺身、天婦羅、沙律、爐端燒,備有多款特式壽司卷,好睇又好食;另有生蠔,爽甜新鮮;必吃的還有日式大蜆湯,湯頭甜到不得了;簡單如燒雞翼都做得好出色,所以多人係好應該。顧客可以自選1款主菜,5款選擇中備有日本肉眼排、炭燒豚肩肉伴松露醬、香辣雞胸肉、素食高菜炒飯、鱈魚等,但其實單吃buffet檯食物已經飽了一大半,值得一提的,是可能因為人流多,食物fill得快,所以款款皆新鮮。

甜品是一個拼盤,好大,小朋友個個見到嘩嘩聲,當中備有甜品、生果及自製雪糕,朱古力流心蛋糕及香蕉布丁不錯。

無呃你,真係成張buffet檯都係人~~~

不喝酒,每位$548已經食到,畀多少少($688)便可飲到紅白酒、啤酒、清酒、Bloody Mary及"R" de Ruinart NV;再矜貴些,加$200香檳可升級至Ruinart Blanc de Blancs NV(即$888)。

用餐時間2小時,可由11am-3pm這段時間入座,3pm入場最後可食到5pm,隨時飽到連晚飯都不用吃。

ZUMA
供應時間:星期六及日 11am-5pm(用餐2小時,最後入座時間3pm)
價錢:每位$548起,設加一。
地址:中環皇后大道中15號置地廣場5及6樓
電話:3657 6388

***
靚靚Kid's Corner TokyoLima半自助式早午餐

日式秘魯餐廳TokyoLima推出的半自助式早午餐,最大特色是設有小朋友早午餐套餐及兒童角落,後者備有畫紙、蠟筆、迷你籃球架及各種玩具,還有糖果Sweet Station,小朋友肯定勁開心。至於小朋友餐牌,可從多款日式秘魯主菜中揀2款,包括吞拿魚壽司、慢煮豬腩肉、蕎麥麵配紫菜天婦羅及芝麻醬,另有果汁、雪糕和雪葩,吃時更可大玩餐廳在菜單上準備的尋字遊戲和填色畫紙,父母可以吃得安樂。

大人呢?可以享用豐富的Omacasa Brunch自助吧,品嘗無限供應的Ceviche、壽司,前菜如Ki-mo-chi Fried Chicken佐以辣醬油調味醬、具有3種口感的沙律T-3配酥脆麵條、S.S蕎麥麵沙律配以牛油果和芝麻,以及慢煮豬腩肉配軟熟麵包;主菜則共有6款選擇:傳統秘魯式拌飯Tacu Tacu﹑Grilled Cod(另加$68)、烤後腿肉牛排Picanha(另加$28)、Grilled Seabass等,最後當然不少得Dessert Station一系列甜點。 

愛喝酒的,每位另加$180便可暢飲酒精飲品,包括血腥瑪莉、長野縣清酒、意大利汽酒prosecco、啤酒、葡萄酒及每周推介的特色雞尾酒。

TokyoLima
供應時間:星期六、日及公眾假期 12nn-2:30pm
價錢:每位$398起,設加一。
地址:中環擺花街18–20號地下
查詢:www.tokyolima.hk / 2811 1152

***
九龍區親子brunch必食 Theo Mistral by Theo Randall La Dolce Vita時令早午餐

Theo Mistral by Theo Randall前身是Mistral,其brunch一向有口碑,現在換上新裝及名廚坐鎮,食物水準更好。

這個La Dolce Vita周日早午餐以健康、新鮮作招徠,可一次過吃到多款意式前菜、海鮮、意大利麵、主菜及甜品,其中海鮮吧備有即開生蠔、波士頓龍蝦、青口、蟹腳等,好豐富。

自家製意大利粉中可2選1,分別是以慢煮小牛肉和意大利煙肉製作而成的Cappelletti di Vitello,以及釀入了瑞士甜菜及火箭菜的田園素菜雲吞Ravioli D’Erbette,2款都好食;主菜就有烤豬柳、香煎鱈魚、焗三文魚選擇,另有舖滿意大利薄餅及素食選擇焗意大利芝士羅馬椰菜花梳乎厘。甜品一樣多款式,阿瑪菲檸檬批、朱古力蛋糕、意大利提拉米蘇芝士餅都是必吃。要喝酒,每位加$138便可享用源源不絕的酒精類飲品,包括Bellini、Bottega意大利氣酒及紅白酒,加$68亦有無限量享用汽水和冰凍的鮮榨橙汁。

精彩位還在於為兒童特設的餐單及兒童遊樂室,後者比許多餐廳所設置的都要大,更安排了經訓練的員工代為照顧小朋友,爸媽可以盡情吃喝。而小童餐單則備有Pizza Margherita、鮮茄長通粉等,4歲以下小童更是免費,加上brunch時間長可慢慢食,所以餐廳成日爆,要訂趁早。

Theo Mistral by Theo Randall
供應時間:11am-3pm
價錢:成人每位$588,4至11歲小童每位$338(設加一)
地址:尖沙咀麼地道70號海景嘉福酒店B2樓
查詢:2731 2870

Text & Photo/ Daphne

部分圖片由官方提供

[延伸閱讀:旺角新食堂「旺角煮場」開幕!6間餐廳包括中日泰美食]

[延伸閱讀:6月必試下午茶!城中新出的4大Afternoon Tea]